ત્રીજા નેત્રની કમાલ:ગઢશીશામાં સોનીની નજર ચુકવી બે મહિલા અડધા લાખના બુટીયા લઇ ફરાર.

 ત્રીજા નેત્રની કમાલ:ગઢશીશામાં સોનીની નજર ચુકવી બે મહિલા અડધા લાખના બુટીયા લઇ ફરાર.

દુકાનના સીસીટીવી કેમેરામાં તસ્કર મહિલા બુટિયા બદલતાં સ્પષ્ટ પણે દેખાઇ

બુટીયાનું વજન જોખવાનું કહ્યું, વેપારી હિસાબ કરતા રહ્યા, ને મહિલાએ કળા કરી ગઇ

માંડવી તાલુકાના ગઢશીશા ખાતે મેઇન બજારમાં આવેલી સોના ચાંદીની દુકાનમાં ગત 7 ડીસેમ્બરના બપોરે ખરીદી કરવા આવેલી બે અજાણી મહિલાએ વેપારીની નજર ચુકવીને જુના બુટીયા મુકીને નવા બુટીયા અંદાજીત 55 હજારના શેરવીને પલાયન થઇ જતા ચકચાર મચી જવા પામી છે.

પ્રાપ્ત વિગતો મુજબ ગઢશીશા ગામે મેઇન બજારમાં મસ્જીદ પાસે અશ્વિનકુમાર ગોવરઘનદાન સોનીની સોના ચાંદીની દુકાન ચલાવતા વેપારીને ત્યાં ગત 7 ડીસેમ્બરના બપોરે એક વાગ્યાના અરસામાં તેમની દુકાને બે અજાણી સ્ત્રી આવી હતી અને તેણે સોનાના બુટીયા બતાવવા નું કહેતા સોની વેપારી પોતાની ખાનામાંથી સોનાના બુટીયાઓ સાથેનું બોક્ષ કાઉન્ટર પર રાખ્યું હતું.

દરમિયાન એક મહિલાએ બુટીયાની કિંમત અને વજન તપાસવાનું વેપારીને કહ્યું હતું વેપારી બુટીયાનું વજન તપાસીને હિશાબ જોડતા હતા ત્યારે બીજી મહિલાએ પોતાના કાનમાં પહેરેલા બુટીયા ઉતારીને બોક્ષમાંથી નવા બુટીયા કાનમાં પહેરીને જુના બુટીયા બોક્ષમાં ગોઠવી દેધા હતા અને બાદમાં ખરીદી કર્યા વગર ચાલી ગઇ હતી. બાદમાં વેપારીને જાણ થતાં ગઢશીશા પોલીસ મથકમાં બે અજાણી મહિલા વિરૂધ ગુનો નોંધવા લેખિત અરજી કરી છે. ગઢશીશા પોલીસે બનાવ બન્યો હોવાનું જણાવ્યું હતું. પરંતુ હજુ ફરિયાદ નોંધાઇ ન હોવાનું પીએસઓએ જણાવ્યું હતું.

સીસીટીવી ફૂટેજ જોયા બાદ છ દિવસ પછી વેપારીને ચોરી થયાની જાણ થઇ 

ગત સાત તારીખે બનેલા બનાવ બન્યો હતો. વેપારી પોતાની દુકાનના સીસીટીવી કેમેરાના ફુટેજ તપાસતો હતો ત્યારે 12 ડિસેમ્બરના દુકાનમાંથી બે સ્ત્રીઓ ચોરી કરી ગઇ હોવાનું દેખાતાં બનાવ સંદર્ભે ગઢશીશા પોલીસેને જાણ કરી હતી.

ગઢશીશામાં છાસવાર બને છે ચીભડ ચોરીના બનાવ

ગઢશીશા મોટુ ગામ હોવાથી અહીં અવાર નવાર ચીભડ ચોરીના બનાવો બની રહયા છે ત્યારે સોની વેપારીને ત્યાં ઠગ મહિલા ચોરી કરી જતાં ગામના વેપારીઓએ પોલીસ મથકે જઇને આવી ચીભડ ચોરી સામે કડક કાર્યવાહી કરવા રજુઆત કરી છે.