સરહદી વિકાસ કાર્યક્રમ:લખપત, ભુજ, ભચાઉ, રાપર તાલુકાના 106 ગામો લાભાન્વિત. જિલ્લાના 106 ગામોમાં સરહદી વિકાસ કાર્યક્રમ

 સરહદી વિકાસ કાર્યક્રમ:લખપત, ભુજ, ભચાઉ, રાપર તાલુકાના 106 ગામો લાભાન્વિત.

જિલ્લાના 106 ગામોમાં સરહદી વિકાસ કાર્યક્રમ

કચ્છના ધોરડો અને ધોળાવીરા સરહદી વિકાસના મોડેલ

સરકારના સરહદી વિસ્તાર વિકાસ કાર્યક્રમ હેઠળ સરહદી તાલુકાઓના ગામોમાં પ્રાથમિક સુવિધાઓ ઉપલબ્ધ કરાવવી તેમજ સરહદ વિસ્તારમાં રહેતા લોકોમાં સલામતીની ભાવના ઉભી કરાઇ રહી છે, જેનો લાભ કચ્છના રાપર, ભચાઉ, ભુજ, લખપત તાલુકાને મળ્યો છે.

રાજયના કચ્છ, બનાસકાંઠા અને પાટણ જિલ્લા પૈકી 7 તાલુકાના 158 ગામો આ કાર્યક્રમ હેઠળ સમાવિષ્ટ કરવામાં આવ્યા છે. કચ્છના લખપત, ભુજ, ભચાઉ અને રાપર તાલુકાના સરહદી 106 ગામો આ કાર્યક્રમથી લાભાન્વિત છે. જે પૈકી લખપત તાલુકાના 49, ભુજના 33, ભચાઉના 11 અને રાપર તાલુકાના 13 ગામોમાં વિવિધ 8 કામો કરવામાં આવ્યા છે.

સરહદી વિસ્તાર વિકાસ કાર્યક્રમ હેઠળ મંજૂર થયેલા કામોના નિર્ધારિત કામો મુજબના સરકારી ધારાધોરણ મુજબ રૂપિયા પાંચ લાખ સુધીના કામો તાલુકા વિકાસ અધિકારી અથવા સબંધિત કચેરી મંજૂર કરે અને જો રૂ.પાંચ લાખથી વધુ રકમના કામો હોય તો માર્ગ અને મકાન રાજય અથવા પંચાયત વિભાગ અથવા તો સબંધિત કચેરી દ્વારા મંજુર કરવામાં આવે છે. સરકારની નવી ગાઇડલાઇન 2020 મુજબ હવે કુલ 11 કામો નકકી કરવામાં આવ્યા છે. સરહદી વિસ્તાર વિકાસ કાર્યક્રમ હેઠળ વર્ષ 2014-15થી લઇ વર્ષ 2018-19 સુધી કચ્છમાં રૂ.13506.26 લાખના કુલ 1002 વિવિધ કામો થયા છે.

રોજગારીની દ્રષ્ટિએ ધોરડો ઉદાહરણરૂપ

જિલ્લાના 106 ગામોની 1,09,206 ની વસતી આ કાર્યક્રમ હેઠળ આવરી લેવામાં આવી છે. 425ની વસતી ધરાવતું ભુજ તાલુકાનું ધોરડો ગામે વિશ્વ ફલક પર ખ્યાતિ મેળવી છે. વર્તમાનમાં વિવિધ નોંધનીય 40 જેટલા મુદાઓ અને વિકાસ રોજગારીની દષ્ટિએ ધોરડો ઉદાહરણરૂપ છે. બન્નીની પ્રજા અને વિસ્તારમાં ધોરડો જૂથ ગ્રામ પંચાયતે ખુબજ ટુંકાગાળામાં ટુરિઝમ ડેવલોપમેન્ટ, હેન્ડીક્રાફટ, કન્યા કેળવણી, સ્થાનિક રોજગારી, પ્રવાસન, ભૂંગાઓ, બેંક, શૌચાલય, ઈ-કનેકટીવીટી, પાયાની તમામ આધુનિક સગવડો સાથે આ વિકસિત પ્રવાસન સ્થળ તરીકે રોજગારી આપતું ગામ બન્યું છે.

આર્થિક રીતે સમૃદ્ધ બનતા આ 3 ગામો

ધોરડો જૂથ ગ્રામપંચાયત હેઠળ સમાવિષ્ટ ઉડો, સિનિયાડો, પાટગર ગામો પણ આર્થિક રીતે સમૃધ્ધ બની પ્રવાસન, હેન્ડીક્રાફટ અને સંસ્કૃતિમાં કાઠું કાઢી રહ્યા છે. વર્ષ 2018-19નો નેશનલ ટુરિઝમનો એવોર્ડ કચ્છ જિલ્લાના ભુજ તાલુકાના ધોરડો ગામને અર્પણ કરવામાં આવ્યો છે.